VV de Beesterbolle

Kestieëlhieër Wiljo I

     



Als gruuëtse kestieëlhieër Wiljo I 2019 wil ich mich gaer aan uch vuuërstelle.

Miene naam is Wiljo Moors, ich bin 51 jaor gelieëje geboeëre as zoeën van Ber Moors en Toos Brangers. Ich bin opgegruuëtj op ‘t Groenewoud en waal oppe Groenewoudlaan. Nao det ich getrawtj bin zeen vae via Fatima en Luuëke uuteindelik oppe Noordkade terecht gekaome woeë vae noow zoeë un twellef jaor woeëne. Fein aan ut water.

Ich woeën dao same met mien leef vrawke Mirlanda, un echt Meijels Dörske, det ongertösse al un paar Wieërter wuuërd kintj. Vae zeen al dik 32 jaor un setje woeëvan bijna 28 jaor getrawdj. Auch zeen d’r doeër de tiêd wichterkes gekaome en waal unne zoeën Jelmer, 20 jaor, dae woeëntj en studieërtj in Breda. En un dochter Amber, 19 jaor, det op dit moment vör 4 maondj stage luiptj in Zuid Afrika.

Di-j 2 hebbe pap en mam steeds minder noeëdig meine ze, mer wat zeen ze altiêd bli-j as ze weer thoeës zeen.

Thoeës is neteurlik ouch os Bo, oeës leef senior hundje. Dae knoeëtertj oppe tiêd mer hae mentj d’r niks van. En as leste, neet te vergaete Tim, ut vriendje van oeës Amber dae óngerhând ouch wecht aan hoeës is.

Wêrke mot ich auch vör de kost en det daon ich beej Johnson Controls in Echt as Sourcing Specialist EMEA in de Fire & Security business. Ut keumptj d’r op nieër det ich al mien leveranciers ut veur aanne schieëne leg vör de beste priês en condities.

Mien hobbies zeen as ieërste schutteri-j St. Job woeë ich al 43 jaor lid van bin. Begonne as tamboerke. Vandao mien óngerscheiding in de orde van de Raokelaar.

Sinds un paar jaor laop ich dur naeve as Commandant van ut clubke. Ich bin altiêd gruuëts as vae met os complete groep wegmarcheren, ut blieëftj un schoeën gezicht.

Dao naeve maake Mirlanda en ich nog steeds meziek en waal beej de Hermeni-j Vannix woeë ich aafwisselendj trom, tuba, bas en deksel heb moge spuuële. Sinds kort oefen ich wat op un trompet, mer det veltj nog neet mej.

Sporten daon ich ouch en waal as voetballer beej FC de Kruisheren. Vae voetbâlle op Boeketj en zeuke nog altiêd now tieëgestanders. Miene speultiêd is doeër völ blessures ongetösse gereducieërdj tot wat invalbuuërte mer de 3e helft gieët mich nog ke-j goot aaf.

Verder wuîles ich aaf en tow met tawwe en gewichte, bootcamp beej MTC Remco Meuwissen.

As leste daon ich ouch gaer un stukske wandele met as hooëgtepunt de Nijmeegse Veerdaagse aafgelaope jaor di-j ich heb uutgelaope. Un weddeschap met mien vraw, aangegange ónger invloed, mer belofte maaktj schöldj.

Vastelaovendj veer ich al zoeëwat hieël mien laeve. Ich heb zoeë un veertig jaor aanne Wieërter stadsoptocht deîlgenoeëme. Ieërst as trommelaar beej schutterij St. Job Luuëke, daonao verschillende jaor met VV de Wiepkes en de leste jaore met Hermeni-j Vannix oppe ker tieëgenoever de Tram.

Ich heb neteurlik auch adjudanten:

Marcel Gielissen, kammeraod en vuuerzitter van Vannix en zeen leef vrawke Tanja. Met zien lingdje hieët hae altiêd snel beer gehaaldj vör os.

Niky Sporen, kammeraod, Bieleman, keizer en vuuërzitter van St. Job en zeen leef vrawke, keizerinneke Susanne.

En Robert Verscheijden, kammeraod, fanatiek tenniser beej TC Boshoven, zelfs aod lid vd raod van ellef beej de jeugd vanne Brokwagters en zeen leef vrawke Carla (un Lempke).

Ich bin d’rvan oeëvertuugtj det ich same met dieës minse, VV de Beesterbolle met unne nowwe vorst en nowwe kanseleer en neteurlik ouch jullie Beesterbolle en Beesterbolinnekes allemaol d’r unne geweldjige vastelaovendj van gaon make oppe Beest. Aan os zal ut in eeder geval neet ligge! Vae haoje wul van un fieëstje!

Ich nuudig uch allemaol van herte uut beej Kefee de Hook op mien resepsie en alle ânger activiteite dit vastelaovendj sezoen, zoeëdet vae nao aflaup kunne zegge: dit waas weer echt unne geweldjige vastelaovendj!.

Dit alles ónger mien devies:

MET DIES DAAG, GEIN GEKNOËETER EN GEKLAAG.

PAKTJ UCH UN PILSKE INNE HAND,

EN FIEESTJ MET OS ME-J IN UT BEESTERBOLLE LAND.