Op zaoterdig 16 november 2024 kome vae um 12:30 oor beej Cafe zaal Hook beejein vör de startj ’t nowwe Vastelaovendjsezoen
Um 14:11 oor zulle beej de kiosk aan ’t St. Raphaelpaâd Opper-Opper Rogstaeker börgemeister Raymond Vlecken en Vorst Jasper van de Rogstaekers, vergezeldj doeër zien Raod van Elf en de Rogstaekersclub, de Wieërter vastelaovendjvereîniginge met heure Vorst en Raod van Elf ontvânge ónger de klânke van heur ouch aanwieëzige meziekkapelle. Aansloêtendj wurtj dan ’t Vastelaovendjveur ontstoeëke, waat de saamhuuërigheid symbolisieërtj, en vervôlges doeërgegaeve aan alle aanwieëzige Wieërter vastelaovendjveerders van alle laeftiêde.
Nao aafloup van dieës ceremonie begint d’r ’n Artiestekerresjél. De vereîniginge verspreide zich oeëver de tapperi-jj inne binnestad, woeë vanaaf 15:00 oor diverse artieste zulle optrei-je. Edereîn és heejbeej welkom um ’t 9×11-jaorig jubileum van Stadsvastelaovendjvereîniging De Rogstaekers mej te veere.
Daenemendje kefees zeen: Du Commerce, De Tramhalt, Theater de Huiskamer, De Harmonie, ’t Kruuënke, Jack’s Pub en De Brouwer.
As artieste kujje de Köpkes, Mén in Pék, de Léste Drej, Ed & Frans, Stefan Wolter en Mark Grijthijsen tieëgekaome.
Roond de klok van 19:30 oor zal de kerresjél lânkzaam eur létste rondje drejje, mer det wiltj neet zégke, dejje dan nao hoês tow mótj.
