Trökblik op sezoen 2023-2024 met eure Aod Kestieëlhieër Raymond I
Beste Beesterbolle, Beesterbolinnen en Beesterbölkes,
as vastelaovendjveerder in hert en neêre heb ich saame met oeës gezelschap ’n onvergaetelik seizoen gehàtj. Waat bin ich gruuëts det ich det met mien beste vrîndje dit avontuur heb moôge belaeve.
Op 12 september kreeg ich ’n tillefoontje van mien vrâw det Marcel Bergmans beej ôs waas en det hae mich woeëj spraeke, ich zoôt op det môment in Buggenum te vergadere. Vae woôre klaor met vergadere, bin in de auto gesproônge en nao hoeës gereeje. Wi-j ich binne kwoôm waas det neet alleîn Vorst Marcel mer auch Johan Smeets!! Toen begos d’r beej mich wul wat te daage. Nao wat met deîndânger gekaldj te hebbe kwoôm dao dan de “vraog”: Wildje aankaomendj sezoen Kestieëlhieër waere vanne Beest? Ich mos dao toch wul oeëver naodeênke wi-j ich det most regelen met de Rogstaekers, want dao bin ich lid van. Nao 3 daag heb ich Vorst Marcel gebeldj det ve ’t ginge doôn, hae mos de Vorst vanne Rogstaekers informieëre. De vuuërpret met de adjedânten en heur gezinne es al um in te lieëste wi-j sjiek det det al es en dan mot ’t nog gaon beginne!
Op 6 januarie 2024 begos dae Rollercaoster vör ôs, as daeje d’r inzitj en hae begîntj te rollen dan hûltje dae neet op wis Vastelaovendjdeensdig. D’r woôre hieëlvöl hoogtepunten, woeë ich d’r now e paar van gaon beneumen:
De receptie van Kroeënpreenses Keet en mich, woeë ich aaf en tôw ’n traönke heb motte wegkvaege, al di-j minse di-j kaome um ôs te fillisitieëre en de prachtige kadoos di-j vae gekreege hebbe, volges Tom hônge ze met de beîn boeëte.
In ’t bezuûndjer wil ich Jeugdpreens Gijs vanne Spoeëkejaegers beneume, dae ich aan ’t bäöke heb gebrachtj, neet wieëtendj det hae ‘nne kleinzoeën waas van mien aod collega Piet van Aerle zaliger, dae 2 jaor daovuuër es gestorven. Ich heb hem ’n prachtig kadoo gegaeve op zieen receptie, mer hae verasje mich en mien adjedânten op ’t Glow in de Dark fieësje. Hae waas met vader Bas, zieën eîge fieëstje in Swartbroôk achter zich te laote, um ôs te kaome ôngerschei-je. Wi-j sjiek es det!!
‘T Preensetreffe beej de Pinmaekers, Jeugdpreensetreffe in D’Oospel, de recepties (vuuëral de Verkusköp met 2 bussen vol), ’t treffe met Stadspreens Ruud I beej ’t Kraenke, Internationaal Preensetreffe in de Oranjerie in Remundj, bezeuk aan Huize Molenveld, Zonnebuizersbal en nog völ mieer.
Ich wil eedereîn bedânke vör ‘ne onvergaetelikke Vastelaovendj, in ’t bezuûndjer de Kestieëlhieërbegeleiders Marcel, Ron,Johan, (privé begeleider Roy Passage) V.V. de Beesterbolle, Café de Hook en nateurlik Kroeënpreens Keet en heur gevolg, want saame hebbe ve dae Vastealovendj gemaaktj en belaeftj.
Dan sloeët ich vör de letste kieer aaf met mien devies:
Vastelaovendj!! Vae gaon d’r mei-j nao bed en staon d’r mei-j op en zette de Beest op zieëne kop!!
