Kestieëlhieër Remco I
Terugblikken met Kestieëlhieër Remco 1
Beste Beesterbolle, Beesterbolinne en anger vastelaovendj veerders.
Mich es gevraogtj of ich un stukske zoëi-j wille schrieëve oeëver waat ich allemaol heb mei-j gemaaktj ut aafgeloupe vastelaovendj jaor.
Det wil ich nateulik hieël gaer daon, allein es ’t allemaol te völ um op te neume dus ich zal d’r waat momente oeët hale.
Mieën verhaol begos op zaoterdig 18 januari, de daag van de oeëtroping.
Dju waat waas det chique zek!.
Same met ut hieële gezelschap hebben vae ieërst lekker waat geborreld beej adjudant Kenny en zieën vrouw Sarina thoeës um vervolges oppe tieëd nao de Hook te gaon.
Achter in ut klein zaelke kreeg ich van mieën adjudante nog un aantal schoeën wuuerd, nog efkes ‘ne dikke knuffel en eindelijk waas ’t moment dao um de bühne op te gaon.
Ut masker ging aaf en un wins van ruum 35 jaor aod waas oeët gekaome!
Waat d’r op det moment met mich gebuurdje kin ich neet beschrieëve.
Het waas gewoeën geweldjig weej völ minse d’r waore, echt fantastisch!
Woeë det ich ouch enorm van genoeëte heb zeën de uitjes nao anger vereiniginge en resepties.
Oeëveral waas ’t angers mer ut waas waal oeëveral fieëst.
Ut waas geweldjig öm met zoeë völ minse van de vereiniging en de kepel inne bus rond te trekke.
Echt hieël erg gezellig, zelfs as det vae Joan ‘ne kieër vergaote.
Ut uitje waat vör os ut meist waardevol waas waas wel de trip nao de finale van ut TVK in Meijel.
Waat waas het fantastisch det zoeë völ minse mei-j ginge um oeëze dochter Noa dao te stuune.
En det waerde mede doeër de gigantische stuun van öch vör Noa beloeëndj met ‘ne verdeendje 2e plaats!
En ich heb begrepe det d’r 31 januari weer un groep supporters nao Meijel kömtj um Noa aan te moedige en det zoei-j nateurlik geweldig zeën as det d’r zoeë völ mogelijk zeën.
De vieëf vastelaovendj daag zelf woeëre ouch onvergaetelik.
Vae hebbe zoeë völ ruige dinge mei-j gemaaktj.
Same met Noa oppe bühne beej Wieërt A-Laaif, het enorm geneëte en lache beej de Wieërter 11, het geneëte en fieëste inne veschillende kefee’s en op de straot, ut mei-j gaon nao ut jeugd preensetreffen met oeëze Kroeënpreenses Janne en heur gevolg enz enz…..
Ich kin zoeë nog waal oore doeër gaon oeëver oeëze receptie woeë det zoeë völ minse de meujte hebbe genoeëme öm os te koeëme filisitieëre tot as Kestieëlhieër nao ut LVK gaon.
Mer ich zal d’r ens un indj aan gaon make angers waerdj dit verhaol nog langer as mieëne speech beej de oeëtroping.
As dejje gaer nog mieër verhaole wilt huure dan kotj gerösj met ein van de activiteiten koeëmendj seizoen met mich kalle want ich heb nog genog verhaole.
Tot slot wil ich gaer nog eederein bedanke dae op waat vör maneer dan ouch hieët beejgedrage aan os fantastische seizoen.
Ich wil d’r nog waal un aantal oeët filteren.
De kapelle deej vör ut muzikale vertier hebbe gezörigtj.
Vrienden en familie öm aaf en tow mei-j te gaon.
VV de Beesterbolle vör alle hulp steun en vreëndschap.
Mieën preensebegelijders en de keuzecommissie deej mieën wins oeët hebbe laote kaome.
Vorst Marcel en Joan vör ut lache.
De familie Reemers van café de Hook vör alle gooi-j zörig.
Kroeënpreenses Janne adjudante Mila en Floor waat bin ich gruuëts op deej meiden!! Top gedaon!!
Vorstin Keet vör ut aanspraeke en in toom haojje van vorst Marcel.
En nateurlik mieën gezelschap, Kenny, Sarina Jessie en Julie, Ivo, Maartje Milan en Senna, Rudi, Sharon Jolie en Louca ich heb met en van öch allemaol genoeëte en bin öch allemaol enorm dankbaar.
En dan nog mieën twieë dames Sylvia en Noa, zonger alle hulp en de goodkeuring van öch twieë haai-j dit alles noeëts plaatsgevonge. Ich bin öch beide daorum enorm dankbaar det vae dit same mei-j hebbe moge en kinne make.
En dan gaon ich now dus nog eine kieër aafsloeëte onger mieën devies.
MET ‘NE LACH OP MIEËN GEZICHTJ, EN MIEËN OUGE AAN ’T STRAOLE, MAKE VAE VIEËF DAAG LANK, DE PRACHTIGSTE VERHAOLE!!!…
En geluif mich minse, vae hebbe echt de prachtigste verhaole gemaaktj.
Vae zeën os snel!..
Aod Kestieëlhieër Remco 1
